Белгисиз ат атоочтор

Ар кандай заттардын, түшүнүктөрдүн жана алардын мейкиндик-мезгилдик же кайсы бир башка касиеттеринин белгисиз экенин билгизген ат атоочтор белгисиз ат атоочтор деп аталат. Мисалы: Эми эмнегедир кытай жөнүндө көп сүйлөөчү болуп баратат. (С.Станалиев) Белгисиз ат атоочтор булар: алда канча, алда кандай, алда ким, алда не, эмнегедир, эмненидир кимдир бирөө, кандайдыр бир, бир нерсе, бирдеме, бир нече ж.б.

Белгисиз ат атоочтор маанилери боюнча бири-биринен айырмаланган өзүнчө топтордон турат.

1. Заттык касиеттин, белгилердин белгисиздигин билдирген ат атоочтор: кимдир бирөө, бир нерсе, бирдеме, алда ким, алда не ж.б. Булар зат атоочтун грамматикалык категориялары менен өзгөрө берет: бир нерсем, бирдемең, бир нечебиз; кимдир бирөөнүн, кимдир бирөөгө, кимдир бирөөнү, кимдир бирөөдө, кимдир бирөөдөн, кимдир бирөөлөр ж.б. Мисалы: Бул райондо биз барардан бир нече  күн  мурун немецтер болгон. (Ж.Бөкөнбаев) Кимдир-бирөө кулагына шыбырап жаткандай. (С.Станалиев)
2. Касиет, сын-сыпат белгилердин белгисиздигин же болжолдуулугун  билдирген  ат  атоочтор:  кандайдыр  бир, кайсы бир, алда кандай ж.б. Булар жөндөмөлөрдө өзгөрбөйт, айрымдары таандык болуп айтылышка ээ: кандайдыр бири, кайсы бирибиз, кай бириңер ж.б. Мисалы: Кайсы бир жылы кар калың түшкөн эле. (М.Элебаев)
3. Сан-өлчөм белгилердин белгисиздигин же болжолдуулугун билдирген ат атоочтор: бир нече, бир канча, алда канча ж.б. Мисалы: Акыр заман болгуча алда канча кылым өтөр, чочуба. (А.Токомбаев) Мүрзөнүн жанында туруп, көзүмдөн жаш тегеренип, көңүлүм алда нече бөлүндү. (Ж.Бөкөнбаев)