Таңгыч ат атоочтор

Айтыла турган заттын, мезгилдин, касиеттин, орундун жок экендигин же ойго тескери келген маанини билдирген ат атоочтор таңгыч ат атоочтор деп аталат. Мисалы: – Чырпыктыда ким орусча окуткан? –Эч ким. (С.Станалиев) Таңгыч ат атоочтор булар: эч качан, эч ким, эч нерсе, эчтеме, эч бир, эч кандай .ж.б.

Таңгыч ат атоочторду да маанилерине жараша топторго бөлүп көрсөтсөк болот.

Кандайдыр заттын же заттык түшүнүктөрдүн жок экендигин, сөзгө катышпагандыгын билгизген ат атоочтор: эчтеме, эч нерсе, эч ким. Мисалы: Ошончо айтылган сөз эчтемеге арзыган жок. (М.Элебаев) Эч кандай табып анын оорусуна дары таба албады. (А.Токомбаев)

Таңгыч ат атоочтор зат атоочтун  бардык категориялары менен өзгөрө берет: эчтемем, эчтемең, эчтемеңиз, эчтемеси, эчтемебиз, эчтемеңер, эчтемеңиздер; эчтеменин, эчтемеге, эчтемени, эчтемеде, эчтемеден; эч кимсиң ж.б.

Кандайдыр сапаттык белгилерди, түшүнүктөрдү жок кылып, танып көрсөткөн ат атоочтор: эч кандай, эч кайсы. Булар жөндөмө   категориясы   боюнча   өзгөрөт:   эч   кайсынын,   эч кайсыга,  эч  кайсыны,  эч  кайсыда  ж.б.  Мисалы:  Эч  кандай тартип бузуулар болгон жок.